دكان زمان
ـــــــــــــــــــــ
أشعار/ ياسر عبد الحميد
ـــــــــــــــــــــــــــــــــــ
انا الواقف بناديكم شوفو الدكان
معلق كل ما ليكم علي الجدران
معايا شموع تنور ضلمة الغلبان
و بيشة و كحل بيكحل عيون غزلان
معايا صبر يا اهل الصبر بالألوان
معايا ستارة تداري الحزن و الاحزان
و طينة حنة أسواني لخلاني
معايا بخور من الجاوي
بيبعد عن ولادنا الجان
معايا كمان دهب فالصو لكل زمان
و خيش بيبان كأنه حرير
بيعمل للفقير قفطان
و قبقاب غالي ابو جلده
يفوت و يلف كل مكان
و لو تكتكت من بردك
في لحظة موت معايا تابوت
و بهادي عليه أكفان
معايا صنية م الفضة ،،
و ابريق لو ها تتوضي
و طشت معاه تسيب رجليك ،،
و شوف بعنيك
معايا طاسة للخضة
و مايه فيها عطر ريحان
معايا شيلان
جايبها ليكو من جَده
بتوب منقوش في تطريزه
تلفه هدية للجده
و مش ناسي الصنيعية
معايا شنطة للعدة
و شلتة قماش عاملها منامة للغلبان
لفرد الطول علي مخدة
بناديكم عشان عاوز أراضيكم
و اشوف ايه اللي يرضيكم
و مش غلطان بهاديكم
وليكو معايا ميت وردة
ـــــــــــــــــــــــــــــــــــــ
ليست هناك تعليقات:
إرسال تعليق