بقلم الفنان الشامل الاستاذ بلعباس المختار الشاعر و الزجال الغنائي و القاص و المسرحي و الملحن و المغني الطربي و الرياضي و الجمعوي من المغرب
و سوق دلالة تݣولو لوحة فنان
★ قصيدة بالزجل المغربي ★
★ الله الله على ذلك زمان
كلشي كان فيه بسيط و زين
★ كان الحب يجمع بين الإنسان
محال تلقى شي فشي شامتين
★ كانت لعشرة عسل بين لجيران
قايمة على ثيقة من هاذي سنين
★ لا نفاق تلقاه واضح فلعيان
أو تنطقو لَفَّامْ و تنقلو لودنين
★ كانت تجمعات ناس فكل مكان
تلقى فيها مجتامعين لعمار كاملين
★ و سوق دلالة تݣولو لوحة فنان
عامرة بجميع صناعية و لمعلمين
★ هنا تجار زربية بجميع لوان
و البراح يعرض سلعتو للحاضرين
★ بعلى صوتو يشكر و يبوح بثمان
و شراية تيتابعو دلالة صادقين
★ لي وقف فيه سوم تلقاه سعدان
و جميع تجار يباركو لو فرحانين
★ كان لقلب علقلب بلا أي بهتان
بلا كذوب بلا سفاهة بلا تشيطين
★ لازمك فسوف دلالة تكون مزيان
ما يتعرف عليك من لغشاشين
★ دخلو بنية و صفى و لمان
و مع لجميع كون لطيف و حنين
★ فيه كل بيع و شرا بلميزان
و كل من دخلوه بلا غدر رابحين
★ تيبداو دلالة بصلاة علعدنان
نبينا محمد سيد المرسلين
★ و تيتفرقو بلحمد و شكر للرحمان
الله لكريم لعالي رب لعالمين
★ هكذا فسوق دلالة كلهم عوان
على لخير و محبة بعضهم موحدين
الشاعر و الزجال الغنائي و القاص
ليست هناك تعليقات:
إرسال تعليق