تصاحب مين
ــــــــــــــــــــــــــــ
أشعار / ياسر عبد الحميد
ــــــــــــــــــــــــــــــــــــــــ
تصاحب مين بقيت مسكين
ماليكش أصحاب
تنادي الأهل و الأحباب
ما بيردوش و قفلوا الباب
و تشهد للي قال لك يوم
تكون طيب
و كان ع الغدر بيعيب
كلامه بيصيب ولا يخيب
لكن في الفعل كان نصاب
تصاحب مين دا طقم أصحاب
بيتبدل لطقم سنان لكن عيرة
يذموا عليك
و يبتسموا علي السيرة
لا عارف هية دي غيرة
و تشغل نفسك الحيرة
و مش قادر تكون كداب
و كان قدرك تكون معجون
بطينة الصبر ع الأحزان
يضيع عمرك بيهم مفتون
لكن بينهم ما لاقي مكان
شراع و قلوع باتت دايبة
و مركب في السفر خايبة
تصاحب مين دي ناس عايبة
ما يحترموش كيان انسان
،ـــــــــــــــــــــــــــــــــــــ
ليست هناك تعليقات:
إرسال تعليق