لوغاريمات
ـــــــــــــــــــــ
أشعار / ياسر عبد الحميد
ـــــــــــــــــــــ
و بقيت من أصحاب المعاشات
بحسب خطاويا الفاضلالي
و اعد حاجات
قولت اتحمل و انا بتأمل
في الذكريات
و ركبت تريند التعلب فات
انا كنت في وقت من الاوقات
ودا كان علي عهدي من السابق
بخدم في مصالح و اتسابق
علي خدمة ناس و لوجه الله
و الناس تدعيلي بسماحة و تقول الله
جِري مني العمر و ده حالهم
عارفني و عارف أحوالهم
و اما صبح حالي بقا حالهم
لقيتني غريب بين مصالحهم
أنا شيلت الهم بقولت آه
و بلف و أدور واكشف مستور
كان غايب عني و انا في ريحهم
اجري في مصلحة كانت ليا
ما القاش حد يرد عليا
شخللت و عديت نقدية
اشبط في طابور و إبقا ضحية
دورة تعذيب علي مطارحهم
و أساتذة بيتحكمو في الخلق
أنا كنت زمان يحترم الخلق
و كلام تأنيب مالهوش تبرير
خُد من دا و عِد هايبقا كتير
و انا بدعي و أقول يصلح حالهم
وجريت ع القبض لقيته فُتات
قبضي دا كان هيبة يجيبلي حاجات
و عرفت ازاي إذلال الذات
انا بحسب قبضي بلوغاريتمات
و بقيت من أصحاب المعاشات
ـــــــــــــــــــــــــ
ليست هناك تعليقات:
إرسال تعليق