طلقت سباق
ــــــــــــــــــــــــــ
أشعار / ياسر عبد الحميد
ـــــــــــــــــــــــــــــــــــــــــــ
طلقت سباق ،،صرخة ألم
و جنين بيخرج من عدم
بعد الرضاعة بيتفطم
يتأمل الصرح العتيق
والبحر فيه مليون غريق
عرف الكلام شاف الطريق
وصل لساحة السباق
كان نفسه يدخل بإشتياق
شد ف لجام حلم البقاء
وقت اللقاء تاه و إتظلم
جوا السباق فرس جامح
قلبه بينزف من أحبابه
وسط الفضا طير جارح
بيوعد نفسه أنه منابه
بَيِت نيه في ليل و شروق
لف و دار في مدار مخنوق
حالف يرمي عليه الطوق
و ما يهموش ايه كان صابه
ارمح و أجري سباق مفتوح
اصمد. عافر زيد في البوح
خلي كلامك صَك علامك
اوعي تبان في الكون مدبوح
قطع كل ضفاير الريح
كَمل أجري بِفكر فصيح
اضحك ليهم و انت جريح
ها تقابل في الساحة و شوش
انسي الجاحد ما تعاندوش
و ارمي الكداب من ورا ضهرك
مهما يقول ما تصدقهوش
ــــــــــــــــــــــــــــــــــــــــ
ليست هناك تعليقات:
إرسال تعليق