بنت الجيران
ـــــــــــــــــــ
أشعار / ياسر عبد الحميد
ـــــــــــــــــــــــــــــــ
يا دنيا فينك من زمان
كل اللي فيكي كان أمان
جدران حيطان و عفار شوارع
فوق رصيف المشتاقين
و فروع شجر متشوقين
مستنيين الزقزقة قبل الأدان
و شاب واقف ع الطريق زي الغريق
حلمه البريئ بيرتجف
في انتظار بنت الجيران
الوقت فات و عنيه تبُص علي السما
و بتمة شايف صورتها
فوق سحابة مُلهمة
الوقت عدا بشكل تاني إنما
سمع نفير بياع غَزل البنات
نادي عليه و قال له هات
راح شد كيس منه و قال
انا العريس ابن الحلال
اللي واقف من سُكات
ضحك و قالله طب و ماله
دا كل واحد عالم بحاله
و أن لقيته في يوم بيضحك
تلقا جواه فدان آهات
انا كنت زيك من زمان ،،
بنت الجيران اللي مواعدها
راحت لغيري في وقت عيدها
و كان نصيبي اشوف بُعَادها
و أقول دا كان و الوقت فات
ـــــــــــــــــــــــــــــــــــــــــــــــــ
ليست هناك تعليقات:
إرسال تعليق