عالم
نسوان نسوان
أنا رحت وجيت
وعرفت وشوفت
وقابلت ستات
أشكال والوان
لو راجل قال لك
أنه خبير
بأحوالهم وشئونهم
يبقى راجل غلطان
دول بحر غريق
لا له أول ولا آخر
يغرق فيه أجدع
بحار أو قبطان
حظك ياحظيظ
بطيخة
لا حمرا لا قرعة
لتكون
كسبان أو خسران
ساعات يبقوا زي
النسمة رقة وحنان
وساعات ياحفيظ
يبقوا بركان
وساعات يبقوا
ملايكة وتعيش
فى الجنة
وساعات يبقوا
أبلسه فشر الشيطان
وساعات كلمة
صغيرة تجبر
بخاطرها
وساعات بكلمة
تعلن عليك العصيان
هى ضعيفة
بس رهيبة اللي
تحطه في دماغها
ياويله
تجيب له جنان
بس بصراحة مفيش
غنى عنهم
نعمة ورحمة واللي
يزعلهم هو الخسران
ربنا وصى أننا نكرمهم
أم وأخت وزوجة
ووصانا
بأكرمهم نبينا العدنان
هم نفسهم يحتاروا
في وصف أحوالهم
وتفسير أفعالهم
فما بالك أنت ياغلبان
أرجع وأقولك اللي
يقول أنه فاهمهم
راجل أهبل وعبيط
دول عالم نسوان
شاعر العامية/ عبد المنعم حمدى رضوان
ليست هناك تعليقات:
إرسال تعليق