حَمِل ،، و شيل
ــــــــــــــــــــــــــــــــــــ
أشعار / ياسر عبد الحميد
ـــــــــــــــــــــــــــــــــــــــــ
اللي يعرف يشيل يحمل
و انت حملك زاد عليك
حمل دمه تقيل محمل
و الكلام قدام عنيك
حمل و شيل يا إبن الحلال
الدنيا فيها كتير. مُحال
و القُدرة بإدين ربنا
فينا اللي قادر و التاني مال
و المال مع اللي بيعرفوه
عارفين طريقه بيشوفوه
و إن قَل مرة يزودوه
و يقولوا إنه مال حلال
و مش حلال تشوف فقير
و تعظم الكِبر بضمير
لو جيت مكانه و تبقا غير
راح تنصدم و تقول مُحال
و مُحال دي كلمة في القاموس
كتبوها ضعاف النفوس
سرقوا الفقير نهبوا الفلوس
و الفقر خربش في الفانوس
مستني جني و ليله طال
ــــــــــــــــــــــــــــــــــــــــ
ليست هناك تعليقات:
إرسال تعليق