دراويش
ــــــــــــــــــــ
اشعار / ياسر عبد الحميد
ـــــــــــــــــــــــــــــــــــــــــ
و بعرفكم أنا دمي تقيل
إكمني ماليش هنا في التمثيل
و اني ما بمشيش علي مذهبهم
و اني ما بقراش كل كُتبهم
و اني انا مرفوض من محاسيبهم
لو جيت مرة وروحت أخاطبهم
برجع مهموم و انا قلبي عليل
و بعرفكم أنا دمي تقيل
أحلامي معاهم ولا حاجة
كنت بقضيها حلاوة روح
و سنيني الساذجة المحتاجة
مالقتش مكان يخرج للبوح
ملامحهم ترسم في حقايق
و بفكر يدوس بلاقيه سايق
ارجع و انا فيهم متضايق
اتاريهم قالوا دا غير لايق
و أنه ما ينفعش يكون بحبوح
ايه المسموح ما لقيتش دليل
و انا عارف اني أنا دمي تقيل
بتحقق من صدق كلامهم
و ألبس توب الصمت معاهم
و بشوف تغريبة في أيامهم
رغم أن عنيا محاوطاههم
بسمع في كلام ما يجددنيش
و بهز دماغي و اقول له تعيش
و أن سألوني طب ايه قولك
اضحك و اقول اوصفهولك
أصل زمانكم هنا ما اختارنيش
وانا قاعد بينكو عشان درويش
رغم اني انا عارف دمي تقيل
و إن كان ع الأنا ،،، أنا راح اقولك
ليها مراجع و كتب و قاموس
ملزمة الفكر المتواضع جايه ف ضلك
عيش مع نفسك راح تدي دروس
اكتب أحلام مالهاش فيهم
و ابعد عن أسهار لياليهم
و انسي أنك يوم راح ترضيهم
ايه هايفيدك لو تجاربهم
و عاليهم جاي بياكل عيش
و بقولها لك ارحم حالك و اظبط نفسك
سيب اللي يعيشله يومين بيعيش
إن شالله يكون فاشل تمثيل
صدقني بقوللك ،، دمي تقيل
ـــــــــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق