/ لكلام هو لكلام
--------------------/
( النقطة اتغير الحرف
الحرف ايغير المعنى
و انت حاير أو سهران
للمجدوب حكمة واقوال
فهموها الناس العقال)
خوك خوك واللٌي ضرباتو يدو علاش يبكي.!
-------------------------------------------------------
(زجل)
لكلام يتبع لكلام
...........و............
النقطة اتغير الحرف
يتغير مفهوم لكلام
و انت مالك امحير.؟
مالك مرة مرة تكبو؟
مرة تطلع.!
مرة تهبط.!
تجري و اتطيح
من حازك عليها؟
لكلام يتبع.......لكلام
حرف.....بلسان عربي
مطروز يحمل حكمة
* المجدوب حالتو حالة
قال كلامو لصحاب الغاية
من فهمو يدرك قصدو
جدباتو فازمان الحاضر
يجمع بين الخير و الشر
يجمع كلام يعبر وايقيس
بساط ايطير ينقل اخبار
هدهود ليه قيمة أو شان
مذكور في كتاب االقرآن
مبعوث....سيدنا سليمان
كل الواحد سرو في قلبو
الحب و العشق يجمعهم
لعداوة اتفرق ما تجمع
لعداوة اصل الحروب
*من يدخل بيت احزين تمة يفهم أنين.!
و انت مالك مالك حيران.؟
صاحب الضغينة
اتراه يضحك بالسن
ساتر افعالو خبيتة
عنداك عنداك تخطا.!
خذ انصيحتي واعمل!
* وحدة ليك وحدة عليك
وانت جاهل فالدنيا امور.!
الغذار ما لو دين ما لو ملة.!
يا خويا لا اتصاحبو
يا خويا لا اترافقو
مثلو مثل الذيب
طابع لغذر شيمتو
يا داخل سوق لكلام
لا اتبيع لا تشري فيه.!
اجعل من صمتك حكمة
والسر في قلبك مستور
احذر من النقطة والحرف
راه المعنى يرجع مقلوب
افهم المعنى من راويه
افهم كلام الحاكي باللغز
جداول غارقة عميقة
ما ليها حد و لا قاع
و اللٌي طاح ابقى تمة
وانخاف
وانخاف
عليك.!
لا اتطيح يومها طيحة
تبقى في درب المجهول
و البير والقصة معروفة
قصةاغريبة يامن يفهم.!
ما انت من الناس الفاهمين
تشرح لكلام تعرف قصدو
اتصرف كل الكلمة بكلمتين
مسكين مول النية غشمي.!
* ضاع وقتو بين ليلة وانهار.!
ضاع ازمانو و الشباب
رجعت ايامو شيخوخة.!
-- بين --
بين مفهوم ولامفهوم حكاياتو
تنزل اثقيلة على صدرو توجع
الغادية و الماجية توام
راجعة لكل حاجة تقضي
تهديك للامر الواقع تجهر
الى اضحك الزمان عليه
شمتت ليام فيه أو باقي
إلى سولتي سول لمجرب
لا اتسول الذيب و لا خوه
قالوا :
راه كانت فرحة غيطة واطبل
دخلوه للغابة غشيم فريسة
حياني عليك وا المغذور
من أنياب الذيب الحادة
* أكلات اللحم مصت لعظم.!
ياك وصيتك و انصحتك.!
هانت اليوم ابقيتي ابطانة.!
شي ايبيع شي يشري فيك
والشاري معروف من لمقام
جيبو و كلامو يكفيه
جيبو و امقامو عالي
الريال والدرهم وسيلة
و الدينار عندهم عبدوه.!
قلت نقطة اتغيرالحرف
حكيتو حكاية بالمعنى
( لا عليكم لا تخافوا من معشر الذئاب
الخوف اصبح من الإنسان الذي يحاكيها )
العابد عبد الرحيم : 07/04/2022 (منقح)
ملهمتي الفقيه بن صالح المغرب تكتب لكل امل تنتظره.
ليست هناك تعليقات:
إرسال تعليق