مشاهد
ــــــــــــ
أشعار / ياسر عبد الحميد
ــــــــــــــــــــــــــــــــــــــــــ
المشاهد ،،هية هية
الوشوش احلام عفية
و المكان مصر الابية
نيل و ارض طول و عرض
صبر مجد شمسها طول النهار
و ف ضلها توته و راكية تحتها
بعد الشقا ،،يتجمعوا اولاد بهية
و الفُرقة بتهد البيوت
عملت تابوت في برج عالي
نسينا نترحم و ليه
ما خطرش يوم ولا جا في بالي
أن الليالي و الوقت يجري
و احنا مش باكيين عليه
الله يجازي اللي فصلنا
من بعد ما قولنا وصلنا
حاصرنا و كان ناتج حاصلنا
صبح في ايد كل اللي اللي ماطل
باطل في باطل يا فؤاد
عتريس مقفل كل باب
شربات محلي بمر سادة
و اللي أتعزم كل الكلاب
و احب اعرفكم يا سادة
الشمس طالعة و النور ضباب
و المختصر كان في الإفادة
أن الوليد من صغره شاب
ألفين صلاة ع النبي
يا موحدين بالله
الصورة دي و النبي
كانت لنبض حياه
كتب الزمان قصته
و الفيلم كان الأرض
ردموه في أول عرض
سبحانه جل عُلاه
ألفين صلاة ع الزين
يا خلق مش عايشين
جابوا التقاوي منين
بيقولوا دا الفيتامين
تزرع و اجباري
بمبيد من الغالي
و الميه في العالي
قدم طلب تلقاه
محصور ما بين سدين
و زيد في سيدك صَلا
أصل الغلا موجود
شوف اللي نام في الخلا
و غيره بات محسود
شوف اللي عاش في قصور
و شريد ببيت مهدود
و الحق أصبح ظلم
لطريق مالوهش حدود
دي الدنيا ولا فلا
اخرتها كَلنا الدود
ـــــــــــــــــــــــــــــ
ليست هناك تعليقات:
إرسال تعليق