*** مرايتي ***
******
بصيت لنفسي
في مرايتي
وسألتها ع اللي فات
مالقيتشي غير إسمي
وجراح وصوت آهات
أما السنين مش لاقيه منها حاجه
خدها الزمن ماسابشي حاجه
مافضلش مالذكريات
غير برواز فيه مرايتي
حاكيتلها و حكيتلي
جزء من حكايتي
أنا
* أيوه أنا *
****
سألتني فين ابتسامتك
وضفايرك و وقصتك
فين الطفله البريئه ؟
راحت فين ضحكتك ؟
وشنطتك الجميله
وعويشتك الرقيقه
ومكياجك بالساعات
وكل ما أسألك
تقوليلي دي هوايتي
ولسه ياما وياما
لسه يا مرايتي
هحكيلك وتحكيلي
أنا
**** * أيوه أنا *
ياه
كبرت فجأة وزادت همومي
ونسيت
جوايا طفله بتقولي قومي
محتاجه أعيش
غيرك إنتي ليا ليا مافيش
رجعتيني لسنين
وذكريات مرايتي
حكيتلها و حاكيتلي
بس
مرايتي بتحكي بدايتي
وأنا بحكيلها نهايتي
أنا
* أيوه أنا *
****
كلمات. /عادل النمرسي
ليست هناك تعليقات:
إرسال تعليق