دواره يا دنيا
ـــــــــــــــــــــــــ
أشعار /ياسر عبد الحميد
ــــــــــــــــــــــــــــــــــــــــ
عديت الحلم اللي رسمته
و قفلت الباب علي احلامي
و قطفت الورد اللي زرعته
و سافرت في رحلة ايامي
و اخدت معايا كام ذكره
بتفكرني بجرح ألامي
أصل المكتوب دايما يوجع
بتفاجئ و الاقيه في منامي
في الدنيا مغارة علي بابا
و كهوف مقفولة بسراديبها
و خلايق بكعوب دوابه
تترجي العطف لمحاسيبها
مالهاش أطماع غير اللقمة
و أن وصلت بتقول دا نصيبها
لكن المحاسيب دايما بتصيب
تنساهم و يزيد مكسبها
الدنيا الدايرة الدوارة
بتلف علينا تشوف حالنا
بنقول لها فينك يا خسارة
دا انتي الأمارة في تغييرنا
سهتنا و رمت السنارة
قولنا لو تغمز هاتشيلنا
ما سابتش ولا اي أمارة
أتاريها بتشوف ناس غيرنا
ـــــــــــــــــــــــــــــــــــــــــ
ليست هناك تعليقات:
إرسال تعليق