شُبيك لبيك
----------------
اشعار /ياسر عبد الحميد
ـ---------------------------
عفريت جالك مادد ايده
بيقوللك ارجع بزمانك لزمان
الوقت معاك تاني نعيده
في حاجات جوا في طي النسيان
ايه طلباتك و احتياجاتك
بس تعرف ,, باقي اخواتك
ان انا عفريت و انك انسان
رديت قولت و ليه هانعيده
و الاحساس ما بقاش احساس
نضرب كف و تاني نعيده
اصل الناس ما بقيتش الناس
لا زمان ينفع يرجع تاني
ولا عمر اتعطر باماني
حتي انت لو كنت مكاني
راح تضرب راسك بالفاس
عمرك يا شيطان ما تكون وناس
ولا انت جايلي تلاعبني لعبه وسواس
و تقلب ماضي و تقلبني علي بني آدمين
اخرص يا حزين
ما تقوليش اني انا محتاس
هاتقلب في الماضي معايا
انا عارف الدنيا هاترسي لفين
و هاتحكيلي الف حكاية
اولها يبكي دموع العين
ما احناش ناسيين ،،
العمر اتسرسب قدامنا
بنكدس و نعبي همومنا
و ضميرنا هو اللي ظلمنا
بين خير او شر ،،بقينا تايهين
اخرص يا حزين ما تقلبهاش
في واحد تدعيه يجريلك
و التاني ما جاش
وسوست لناس طلعت اوباش
و مرضت نفوس ،، اخرص يا كابوس
الحلم معاك ما بفسرهوش
دا ،، المر عشان استطعمناه
بقا شئ فينا ترياق لحياه
و احنا الصابرين علي قولت آه
دايما بنقول ،، سبحان الله ،،
-----------------------------
ليست هناك تعليقات:
إرسال تعليق