أحضن الايام
**********
أشعار / ياسر عبد الحميد
---------------------------
لما تبقا الدنيا ،، لمة
و الطريق بينا ،، مسافر
لم وجعك ،، لو بضمة
احضن الايام ،، و عافر
فاكر زمان يا صاحبي تعالي
احكيلك ،،و الناس تسمعنا
شوفنا الدنيا في اجمل حالة
معانيها تقوللك رجعنا
شوفنا الحارة الدافية زمان
و اللمة اللي في وسط جيران
شوفنا الاهل مع الخلان
و المكسور فيهم يوجعنا
شوفنا عيال لعبت في الشارع
و المولد و شجيع السينما
شوفنا كنيسة و قبلها جامع
عم محمد كان جار،، مينا
كنا العيله في قلب بيوتنا
قلبنا ابيض نقسم قوتنا
و المجدعة كانت بشروطنا
و الاصل الطيب ينفعنا
شوفنا إذاعة و راديو في بيتنا
مشايخنا ترتل قرآن
و اتوضينا بأبريق بيتنا
شوفت الدنيا دي ،، و الله ،، زمان
كان فيها خيالنا بيسبقنا
و لا يقدر حد يفرقنا
شوفت يا صاحبي بقينا ازاي
لما الحال بقا غير الحال
نفسنا نرجع ،، بس ، ازاي
ولا زماننا ،، زمن ،، ترحال
حتي العيشة مالهاش معني.
---------------------
ليست هناك تعليقات:
إرسال تعليق