زجلية تحت عنوان
***عند لغريب
عند لغريب
تبقى غريب
وخا تبخرو بالجاوي...
عود لقماري والطيب
عند لغريب
هي الصورة صورة ذيب
جامي ترجع صديق او حبيب
لإثنية مقيداه
حس الأنا الأعلى وما ادناه
التمييز ولميز والتشلهيب
على ظرافتك يدوس ويتعامى
يركب بساطتك معبر ويترامى
يتعلم فيك العنترية وجديب
لغريب بالظن راسو عامر
لعقل مجمك يبغيك صاغر
صواب ؤ لفهامة الله يجيب
يحفر لحفاري ويبني ضرار
الضحكة الصفرا طبعو نكار
يبغيك في الغلة...
ؤ ف الحزة يخوي ويغيب
بل يصبغك باهلا وسهلا ي غالي
يلبسك بكذوبو مجوف خالي
ؤ في غيبتك بلسانو...
ينقبك نقيب
فيا صاحبي احذر ؤقلب عن هناك
صادق نفسك واقنع بكساك
م يهم اش دار هذا آش حط هذاك
حظي الصحيحة و لعوينات والجيب
في هلك لا تفرط ديرهم دراعك
هما الخير لا ل شراك ؤ باعك
زرع السماحة ولمحبة...
كون مراية لنفسك ؤ طبيب
اما ذاك لغريب
راه دفلى
م يليق طبعو عقد ودملة
والحنظل يبقى طعمو حنظل...
ؤ جامي يعود عسل او زبيب
ليست هناك تعليقات:
إرسال تعليق