🌍🌻🌍🌻🌍🌻🌍🌻🌍🌻🌍
#من_ديوان_الحناوي
(( #مين_يشتري_الوهم_مني؟))
بشعر العامية المصرية.
مين يشتري الوهم مني ؟
وانا بنادي وامَنّي
أمنى نفسي بشنطة فلوس
تحل أزمه تطرد كابوس
مين يشتري مين يشتري
ربك دايما عالمفتري
****. ****. ****. ****
أنا كل مره بنزل أشوف
سوق العطاره يا دي الكسوف
كمون بلدي على الرفوف
سعره غالي بص وشوف
وفلفل أسمر تمنه ألوف
خد لك حِفْنه لاجل الظروف
وبُن ساده شادد حيله
والمحَوّج ماشي في ديله
بكام الربع يلا اديله
خمسمايه وقرب شيله
لاجل تشرب مع الضيوف
وتبعد دايما عن الكيوف
****. ****. ****. ****
حتى الكركم والحبهان
ممكن يِسْوُوا في نظرك كام
ادفع ما هي خسرانه خسرانه
اوعي تعيط وتقول يانا
الغلا ماشي زي الصاروخ
والغلبان دا قرّب يدوخ
حد يوقف قطر السعر
لاجل البركه تكون في الرزق
****. ****. ****. ****
جبت الغاز اللي انتا حتعمل
بيه القهوة ودور الشاي
ما تفتش في جيبك تاني
دا اللي راح اكتر م الجاي
كل فلوسك راحت منك
عالعطارة وباكو الشاي
وانتا ما حدش أغلب منك
داعيين لك بصلاح الحال
****. ****. ****. ****
شفت الست اللي عالنت
اللي شقتها اتسرقت منها
دهب أصفر وفلوس ياما
بتكفيها ليوم القيامه
كل دا كله غير الدولارات
بالملايين وكمان يوروهات
وباقي الشعب بيلحس إيده
حاسس إن الحظ يكيده
نِفْسُه الرخا يِوْفِي بمواعيده
طمعان دايما في كرم سيده
أصل الغلا دا مولع إيده
****. ****. ****. ****
فيه ناس عايشه فوق السحاب
وناس عماله تسف تراب
ناس تتعشى بخمسين ألف
وناس تتمشى تدوخ م اللف
علشان تكسب حق العيش
ولابسه ملابس زي الخيش
أصل مفيش قماشات ع الرف
مش حاقدين أبدا على حد
بس الكسب يكون بالجد
وحق الفقرا لازم يترد
وحق الدولة عِدّوه عد
************************
بفلم د / عبد الرحمن فتحي الحناوي.
من مصر.
ليست هناك تعليقات:
إرسال تعليق