المسلسل الدرامي الجنوبي الوهدانيه ( قدري ).... الحلقه الأولي ..... المشهد الخامس ...... في الوقت الذي أستيقظ فيه الريس ياسين صاحب القهوه التي تقع على ناصية أول الطريق المؤدي إلى داخل قرية الوهدانيه. وتطل علي معدية القريه الوحيده عبر نهر النيل إلي بر البندر. وقد أخذ الريس ياسين بمساعدة صبيه محروس. في تجهيز القهوة للعمل واستقبال الزبائن من الصباح الباكر. حيث ساعد موقعها وقربها من طريق المعديه. في أن جعلها مقصدا للقادم إلي القريه وأيضا المغادر لها. وها نحن نستمع للريس ياسين يقول لصبيه محروس يالا شد حيلك واتعب شويه زياده النهاردة علشان معدتك تستعد لهضم اللحمه إللي حتاخدها من دوار حضرة العمده ... فقال له صبيه محروس وهو يقوم بعمله ألا صحيح قولي يا ريس ياسين. هو صحيح الأستاذ رأفت ابن حضره العمده اتخرج أمبارح وحيبقي ظابط ذي أخوه الكابتن حسين ... فحدق فيه ياسين قبل أن يقول له صحيح يا لمض بس الكابتن رأفت حيبقي ظابط شرطه لكن الكابتن حسين ظابط جيش. يعني إحنا من اليوم في حماية الجيش والشرطه. ثم أبتسم له قبل أن يكمل قوله شفت أنت بقيت مهم كد ايه ... فقال له محروس بس انا فرحان صح والله يا ريس ياسين. لأن الناس دول ومش علشان موضوع العموديه ولا حتى اللحمه لا والله هما يستاهلو كل خير ... فاوما له ياسين برأسه إيجابا قبل أن يقول له. والله أنت طلعت بتفهم ياض يا محروس لأنهم هما بالفعل أهل خير ودا مش جديد عليهم ... فقال له محروس وهو ما يزال في عمله من تنفيض ورص للكراسي والترابيزات. تقصد ايه بكلامك ديتي يا ريس ياسين ... فتحرك الأخير إلي خارج القهوه ونظر بعيدا باتجاه دور عائله الوهدانيه. وفي القلب منها دوار العمده أحمد عبد العال وهدان. قبل أن يعاود النظر إلي صبيه محروس ويقول له. أقصد أقول إن الخير اللي هما فيه ديتي اتوارثوه اب عن جد إللي هو جدهم الكبير وهدان بك رحمة ألله تعالى عليه. ثم أشار ياسين إلي محروس بالاقتراب. ولما أقترب منه أشار له بيده بعيدا قبل أن يقول له شايف أنت القبه العاليه اللي هناك دي ... فقال له محروس أيوه شايفها يا ريس مش قصدك علي القبه اللي واخده جنب في ساحة دوار العموديه ... وقال له ياسين أيوه هى دي برافو عليك. أنت عارف القبه دي تبقي ضريح مين ... فحدق فيه محروس دون اجابه واكتفي بهز رأسه يمينا ويسارا ... ولما راي منه ياسين ذلك قال له دا يبقي ضريح جدهم الكبير وهدان بك. ثم نظر ياسين مجددا بعيدا باتجاه الضريح قبل أن يعاود النظر إلي محروس وهو يقول الناس دول يا محروس هما تاريخ القريه ... ولما حدق فيه محروس متعجبا ... أكمل ياسين قوله امال أنت كنت فاكر إيه وهي القريه اتسمت علي اسمهم ليه يا ناصح ... فاوما له محروس برأسه إيجابا واعجابا بما قاله له ... قبل أن يكمل ياسين قوله انت تعرف كمان إن القهوه دي منصوبه علي أرضهم وأنهم سايبينهالي استرزق منها نظير خدمة أبوي ألله يرحمه ليهم بإخلاص لسنوات طويله ... فقال له محروس لا دي حاجه أنا أول مره أعرفها. لكن إللي أنا عارفه يا ريس ياسين إن المعديه الوحيده إللي في القريه. واللي بتخدم البلد كلها هي اللي بتاعتهم وحتي الطريق إللي بتوصل ليها بتاعتهم برضه. والعجيب أنهم نادرينها لله. ومبياخدوش أي فلوس من أي حد بيعدي بيها رايح أو جاي. حتي لو كان غريب ثم نظر محروس بعيدا باتجاه المعديه المرابطه على حافة نهر النيل قبل أن يقول يا ربي دا لو المعديه دي بتاعتي أناااا كنت ... فعاجله ياسين بقوله كنت حتعمل بيها إيه يا فالح ... واجابه محروس بقوله مجددا يا ربيييي دا أنا كنت أكسب منها جرن فلوس بس هي الناس دي محتاجه فلوس يعني ... فضربه ياسين على كتفه من الخلف برفق. قبل أن يقول له طيب يالا شوف شغلك يا فالح. قبل ما تقعد تحسد في الناس كدا عمال علي بطال. فابتسم محروس لدعابه ريسه ياسين قبل أن يقول له أمرك يا ريس. ثم انهمك في عمله بالقهوه مجددا .... مع أطيب تحياتي الأديب محمد يوسف
ليست هناك تعليقات:
إرسال تعليق