جناين ورد1
هنا جناين بتطرح ورد
هنا دم سايل بيروي الورد
هنا ورد خدودك سارح على عودك بيطرح شهد
هنا ليل الأسى راح واتنسى
وانتي هنا شهيدك حاضن هنا عودك
وبيدل وبيعدل ومن دمه بيروي كمان الورد
هنا شهيدك بستان وطارح ورد
وهنا شهيدك بلون ورودك ولون خدودك وريحت الورد
هنا تطلع هنا شمس هنا يرجع من جديد همسك هنا يكون كون بأجمل لون هنا هيبقى كلام موزون
هنا مفيش هرتلة ولا برجلة ولا هنجلة بكل شكل ولون
ولا هبقى سفيه مجنون
هنا يرحل ظلامك ويحلا كلامك ويتزهزه وصوت البلابل والسنابل من بعيد ومن قريب ينده
ويتغير بقى حالي واعيد من جديد موالي
هنا هتنسي كل ما جرالك
هنا ياعروسة البحر حلك وترحالك
جناين ورد 2
أنا هنا بس اللي شاهد وصامد وسايل هنا دمي
انا وحدي أنا جندي هفوت في الصخر وأعدي
عشانك انتي حبيبتي وبنتي وأختي وأمي ودمي يبقى من دمي وهمك هو اللي كان من زمان همي
هنا انا اشيلك واناديلك وانور قناديلك وازيح الغمام ويطير الحمام ويصحى من المنام ليلك
ولاتشوفي من تاني سواد ليلك
جناين ورد 3
أنا إسمي من إسمك
وانا رسمي من رسمك
وانا اللي في الخيال من زمان راسمك
وع البال راسم كمان رسمك وحاطك في قلب الكوشة عروسة وست الحُسن
ماانتي الدفا والحُضن
شيلتيني وانا زغير ومش ناسي ولا قلبي كمان قاسي وعمري في يوم ما هتغير
وعمري في يوم ماهتغير
ولا حتي في يوم هكبر
محمد صادق
ليست هناك تعليقات:
إرسال تعليق