هذه الكلمات كنت نشرتها من عدة سنوات
ظهرت لي في الذكريات
رغم مرور السنوات
أجدها مناسبة لكل الاوقات
نجد بيننا كثير من هذه الحالات
**************************************
( الحالة متصل)كلمات/صبري حسين
متصل
اللمبة منورة
الحالة متصل
علي النت متصل
لكني فاصل
عن كل الحياة
زهقان
قرفان
تعبان
الحالة متصل
لكني
حتي عن نفسي منفصل
لا قادر اتحرك
الحروف مخصماني
قلبي واجعني
عقلي غايب عني
النوم معاندني
ليلي موصول بنهاري
تتلاعب بي افكاري
اللي يبص علي صفحتي
يلاقيني متصل
اللمبة قايدة منورة
لكن فيني انا
فين صباحتي علي كل اصدقائي
فين منشوراتي في كل جروباتي
فيني انا
ياللي شايفيني متصل
هو ده حالي
من امتي وانا مش بصبح
فيني وفين تعليقاتي
متصل
هو ده اللي بيني وبينكم
طبعا ظنونكم
اني انا اللي همالكم
انا اللي ببعد عنكم
هو ده اللي جاي علي بالكم
الحالة متصل
لكني غير متفاعل
في حد خطر علي باله يسأل
يدور عن سبب عدم التفاعل
ليه كل ده التجاهل
ياللي صباحي كان لك كل يوم
فات يوم. وراه يوم
لافي مني صباح ولا مسا
لا في منشور هنا او هنا
من كل الاماكن اختفيت انا
كل اللي باقي مني
اللمبة منورة
الحالة متفاعل
فين حق الصداقة
وروني عليها علامة
لما توقفت صباحتي
اختفت من كل الاماكن منشوراتي
لما قلت تعليقاتي
يوم من بعد يوم ماتت كلماتي
كل ده مش بيعطي اشارة
منتظرين ايه
اعلن وفاتي
ينزل نعي علي صفحتي
الحالة متصل
علي النت متصل
لكني عن كل ماحولي منفصل
انفصلت عن نفسي
كل شيء جوايا بقي غريب عني
انادي علي ضحكتي
تجاوبني دمعتي
فينك يا فرحتي
ليه بعدي عني
خليتي الحزن ساكني
الهم معايا كظلي
نفسي حد يسمعني
يحس بحالي
نفسي حد يفهمني
يمد ايده ياخد بيدي
من احزاني ينقذني
الحالة متصل
علي النت متصل
كل اللي بيجمعنا لون اللمبة
كل اللي بيجنعنا الحالة علي الصفحة
متصل
متصل
ياه يا فيس طلعت اكبر كذبة
والله ما ليك اي. لازمة
فعلا. عالم افتراضي
لا تقول اخوة. ولا صداقة
مجرد وقت بنضيعه
البركة في الموجود
اللي يغيب يغيب
عمره. ما كان محسوب
شوف في صفحتك كام صاحب
قلب كدة في الاسماء
اغلبهم مجرد اسماء
بص كدة وشوف
الغالبية متصل
لكن مابينا انفصال تام
مجرد كلام في كلام
الحالة متصل
علي النت متصل
لكني منفصل
مش بس انا لوحدي اللي منفصل
الكل عن بعض منفصل
حتي لو كان علي النت متصل
متصل من غير اهتمام
من غير تواصل وكلام
متصل من غير عن بعض نسأل
تساوي منفصل
قبل ما تكون علي النت متصل
حاول بالحياة تتصل
ليست هناك تعليقات:
إرسال تعليق