باب حارتنا
ــــــــــــــــــ
أشعار / ياسر عبد الحميد
ـــــــــــــــــــــــــــــــــــ
باب حارتنا
مكتوب عليه حارة الغلابة
الابتسامه دايره بينهم
و الوشوش فيها الطيابة
اليوم بيبدأ
بالصلاة وقت الأدان
الكل نازل من البيوت
و جيران تصبح ع الجيران
حتي اللي قافل بابه
و مسنكر عليه
بيشاوروا ليه
وقت أما بان و يقولوا
يسعد صباحك
انت فينك من زمان
علي باب حارتنا
الدنيا ماشية اصول و جد
اللي الشقا مكرمش جبينه
و اللي ماشي الله ، يعينه
و اللي شقيان طول سنينه
بيبان في عينه
مقضي كل حياته كد
علي باب حارتنا
كل واحد شاف مراسه
حافظ مقامه و عزوته
بين وسط ناسه
و أن يوم يغير هدمته
ما تغيروش نفسه العفيفة
مش زي ناس بتبان سخيفة
يتبري من أصله و اساسه
من باب حارتنا
كنا نتعلم قيم
الكبير هو الكبير
و الصُغَيٓر مُحترم
و المبادئ من عهد بادئ
منقوشة ع الايد و القدم
و سيل معاني ما ننساهوش
و قلوب تعلمنا الدروس
و الغل فينا ما نعرفوش
اسلوب حياه اوتارها معزوفة نغم
ـــــــــــــــــــــــــــــــــــــــــــــــــــ
ليست هناك تعليقات:
إرسال تعليق