ما بتكلمش
ـــــــــــــــــــــــ
اشعار / ياسر عبد الحميد
ـــــــــــــــــــــــــــــــــ
ان كنت ما بتكلمش
لأ في جوايا كلام
و إن قولت ما بتألمش
ماشي بأوجاع و آلام
سألوني ليه ما تسألش
انا شايف الدنيا ركام
و أن قالوا ما تتعشمش
مدرسة الدنيا علام
عايش و كلامي قليل
بضحك لكن تمثيل
لو جشع الدنيا ها يكسرني
مع نفسي بقول الصبر جميل
احزان الدنيا المنسية
فتحت شباكها لأوجاعي
و تلاهي الناس المخفية
طرحت في طريقي بغير داعي
و سنين أحلامي المطوية
جت حبة ريح واربت بابها
وريتني صاحبها و أحبابها
فتحتلي صحيفة أوجاعي
سكة أوجاعك مشي فيها
مجاريح و الدنيا مخاصماهم
الشوك محاوطها مغميها
بتقطع فيها ملاحقتهم
شربوا الأيام حلو مرارها
دوبوا في همومهم سُكرها
و دموعهم سبحتها اتفرطت
و اتخرطت بين ناس عرفاها
الدنيا بتطرح كام وردة
محتاجة جنايني بيرعاها
مش ناس غلاطة و ناس باردة
لابسين في وشوش تحت سماها
ولا ناس أمارة بتتغير
ولا ناس شماتة بتتنمر
ولا ناس في الكارثة بتتصور
دول تبعد عنها و تنساها
في الدنيا خيالك بيوريك
دنية أحلام مالهاش تفسير
تتأمل فيها تبكي عنيك
و هاتحلم ليه و مافيش تبرير
ترجع لخيال تتشعبط فيه
لو جبر الخاطر حن عليه
راح تعمل ايه و مافيش تقدير
ــــــــــــــــــــــــــــــــــــــ
ليست هناك تعليقات:
إرسال تعليق