ابن اصول
ــــــــــــــــــــــــــ
أشعار / ياسر عبد الحميد
ـــــــــــــــــــــــــــــــــــــ
عاتبني ،، لو معاك الحق
حاسبني ،،مش كلام بالزق
شايفني ،، ايديا ورا ضهري
و لو هارفعها ادقك دق
انت يا واد مش كنت بتلعب قدامي
و انت بتمشي بتسند ع الحيط
فاكر لما رميت كورة علي قلة جارنا
سألوني عليك انا قولت جريت
و غطس في الشق
يخرب بيتك خلتني كدبت
من طيبتي انا خوفت عليك
و نكرت الحق
دلوقتى لقيتك قدامي فأردت طولك
افهم قولك دي سنينك
تجري قصاد عيني و اوام شبيت
و كبرت بحق
أنا عاوز أعرف منك يا فصيح ،،
قول بصحيح أمتي اتربيت
جاي تعمل راجل قدامي
و فاكرني نسيت
دا ، ابوك كان صاحبي
وكان يحكي عليك أفعالك
و انا اقول له يا صاحبي
ده واد عيل إرحم حالك
و انا نفسي اقول كل كلامي
و اسمع مني لنهاية القول
أبو ربع جنيه في التربية
ما شافتش أصول
و اصحابك غاوية المرازية
و انت المسؤل
و إن كان أبوك سابك ترمح
في الشارع علشان مشغول
بيجيب اللقمة اللي تغذيك
يتعب يراضيك بحلال و اصول
و امك بتداري في أفعالك
و بتدعي الله ، يصلح حالك
و معاك ولا فارقة في احوالك
اكمنك ماشي بتطوح زي المسطول
خليك فاكر دي خلاصة القول
لو ما اتربتش انا راح اربيك
و هافرج كل الخلق عليك
انا عارف في غشاوة علي عنيك
ارجع يا ابني ربنا يراضيك
ارجع انسان دا انت ابن ،، اصول
. ــــــــــــــــــــــــــــــــــــــــ
ليست هناك تعليقات:
إرسال تعليق