طينة ،،آدم
ـــــــــــــــــــــــــــ
أشعار / ياسر عبد الحميد
ـــــــــــــــــــــــــــــــــــــــــــ
انا من طينة آدم
و آدم من تراب
الإسم كان للندا
م الأهل و الاحباب
و الوصف لما ابتدا
كان طفل أصبح شاب
و الدنيا وطوافة
غامقة و شفافة
أوجاعها متشافة
خلتني كهل و شاب
آدم أكل م الشجر
و الزلة زلة شيطان
طهر خطيئته بحجر
و استغفر الرحمن
نزل في أرض براح
شاف الجراح ألوان
و إتأمل الفكرة
في الأصل كان نَكرة
في الشكل و المضمون
دخل المدار إنسان
كل الكلام كداب
و الصدق فيه تراطيش
في قلوب بتغلي عذاب
و قلوب في لحظة تعيش
ماهي قصة جوا كتاب
جابها القلم بآلام
كان ود ،، آخره خصام
في سيناريو ما رحمنيش
ـــــــــــــــــــــــــــــــــــــــــــ
ليست هناك تعليقات:
إرسال تعليق