همسات زوجة
طول عمري بصالح فيك لما انتا تكون زعلان
وبيبقى الحق عليك وتكون انتا الغلطان
وانا آجي أدَلّع فيك بكلام من أحلى لسان
واتمنى تمد إيديك وتاخدني بالأحضان
**********************
بَسَامحك واجي اراضيك واقول لروحي كمان
وتَمَلٌي أحايل فيك واديلك صك حنان
وعمري ما باجي عليك وباجي على نفسي كمان
واقول ربي ينجيك وتكون لي حصن أمان
********************
أصحاب واقفين حواليك وانتا مبسوط فرحان
ما شفتش غيرتي عليك وانتا سرحان هيمان
مع واحده راميه عليك شبك الصيد الفتان
تتمنى ضي عينيك وتضحي بالخلان
وانتا مستني تجيك وتخبط عالبيبان
*********************
خبيتك جوا عيوني وقفلت جفوني عليك
وسيبت الناس يلوموني من كتر تَعَلُّقي بيك
دول أصلا ما يهموني ولا بالي بهم شغلان
أنا عارفه انك ميموني وحبيبي وصاحبي كمان
حبيتك حب جنوني عمر ما حبه إنسان
ليه تصرف نظرك عني وانا قلبي بيك هيمان
*********************
الصدفه جمعت بينّاا والنظره كانت عنوان
والهمسه جسر محبه وعباره عن فيضان
من بحر عواطف وانتا حاجز في القلب مكان
خليت الكل بيخفى ويقول على طول غلطان
وف لحظة بيصحا وينسى ويشوف حاله ندمان
على وهم الحب ولسه فأكره حقيقه وبرهان
********************
الحب الصافي أساسه إنك تفضل قلقان
على بُعد حبيبك ناره قايده ف كل الأركان
نار شوق وفراق أسراره محبوسه ورا القضبان
الحب أساسه نضحي نصنع م الصعب نيشان
ونخلي القلب يلبى دعوه تهز الأركان
ونشوف الدنيا دي بمبي تحرق قلب الشيطان
*******************
صاحبك دانا عمري ما اقوله علمني شويه العوم
دانا أصلا غاويه أذله وابعد عن نفسي اللوم
شجرة بيتنا منهاره نازله دموعها بغزاره
صعبان عليها انك غايب وهتدبل بعد نضاره
كان لها من عطفك نايب. راح فين عطفك يا خساره
**********************
استنى وخدني معاك ما تسيبنيش للأفكار
تنهش وتهد ف راسي واتْعذّب ليل ونهار
خايفه لو غبت أنساك ما اوصلش معاك لقرار
وانا لسه بعاني واقاسي ما تسيبنيش وحدي انهار
********************
الدنيا مِرَيّحه مين قوللي يازعيم القُوم
لو جابت خير بيمين تديك بشمالها هموم
هو انتا مع الفايزين ولّا مشاكلك بالكوم
حرّس م الدنيا وعين اليائس والمحروم
واسهر صاحب النجوم ولا تستسلم للنوم
دا اللي فات كله كوم والجاي دا أكبر كوم
********************
طولت عليك القول خليتك تزهق مِنّى
وانا دايما حتى بصوم عن أي كلام اعذرني
لكن كان نفسي اليوم أحكيلك عاللي شاغلني
وأفضفض من غير لوم وانتا ترد تطمني
********************
كلام الناس بيودي في سكه ما لهاش آخر
خليه عالودن يعدي واعمل نفسك مش فاكر
الناس بتحب تِقَضّي أيامها تِعِيب وتفاخر
وانتا مش لازم تِرْضِي الناس كلها عالآخر
خليك ماشي كده دوغري تكسب ماضيك والحاضر
**********************
العين الصفرا بتأذي وتودي في شر مكان
وانتا عُرضه للحاسد دا مفيش في الدنيا أمان
حاربه خليه يتفاجيء بالذكر وبالقرآن
دول هما الحصن الحامي م العين ومن الشٌَيْطان
بتمنى ترجع تاني وتعيش بينّا سلطان
**********************
بقلم د / عبد الرحمن فتحي الحناوي .
من مصر.
الأحد ٨ من سبتمبر ( أيلول ) سنة ٢٠٢٤.
ليست هناك تعليقات:
إرسال تعليق