حَمَّام همام
همام اتخرج ملجامعة
ظات عالفيس والناس شايفة
و سامعة
مالفرحة امه نزلت منها الدمعة
الكل باركله والقعدة طالت
كان فاكر المستقبل فارد لمعة
اتاريه مقابله بهموم اصعب
من ايام الجامعة
همام فكر يعمل مشروع
عمل كوباية شاي وسيجارة
ملحيرة يتنطط زي المصروع
والحالة بتسوء والمسكين
هيموت ملجوع
مسكين الشاب ياولداه
قعد يفكر ودماغه هداه
لفكرة مش محتاجه الأه
و فلوسها بسيطه جنب الحيطه
دا حداه أخ و تنتيين خوات
هريدي وشربات وحلويات
وأمه مريضه وفقيره
نفسها تستر البنات
همام جه عالميدان باهتمام
عمل كام كرتونه حيطان
وكوز ميه وبستله شغل فنان
و كتب عليها حمام
فك الزنقه بألف والراحه يسلام
انت وذوقك شوف هتدفع كام
مفيش فصال خير الكلام
واهي شغلانه احسن من
الاوهام
اكل واصرف احسن ملقعدة
واعيش بحلال ولا اكولش
حرام
بكره الحمام يكبر واعمله رخام
وهييجوو يهدوه اعمله تاني
ويهدووه زي الأحلام
ما انا في العند عندي فصام
شارووو عليه طلع تصريح
راح للبيه قالهالوو بفم صريح
قالو ابجني تجدني يافصيح
يا كدا يا مفيش تصريح
يا تنتظر الدور علي ما يصيبك
قضيها تسابيح
اخد اوراقه ويا شهادته
يعلقهم عالحمام
وادي قصة خريج جامعة
المعلم مستر همام
ليست هناك تعليقات:
إرسال تعليق