الطبيب العائد
يا اللي نسيت الطب تعالى يلا اتعلم شغله جديده
جات لك ستين حاله وحاله والمعلومه لسه بعيده
ليه بتحاول تخدع نفسك وانتا لوحدك حاله فريده
كنت بتكشف كشف مثالي لكل مريض وكل مريضه
*****. *****. *****. *****
ليه ضيعت الوقت بحاله سهران تلعب طاوله وسيجه
شفت زمايلك قالوا إيه عنك لما اتعرفوا عالنتيجه
نتيجة آخر سنه في الطب للخريج والخريجه
كنت بتقديرك متفوق إنت ( الجيجا ) وهمَّ ( الميجا )
*****. *****. *****. *****
قالوا عنك ذكي موهوب لكن وقتك مش محسوب
بتضيعه من غير ما تحس والإهمال بقى كله عيوب
قول إيه منعك إنْ تبص على معلومه في اليوتيوب
أو تدخل مكتبه وتخص كتب الطب بالمطلوب
ليه بتكسِّل مش بتحس وجهدك قل وبقى معطوب
وحياتك من يوم ما شطحت صبحت ماشيه بالمقلوب
*****. *****. *****. *****
يا دكتورنا يا كل أملنا من خبراتك نستفيد
ارجع تاني لنا وعيالنا نكشف عندك كشف جديد
سيبك من تفاهات الدنيا وصحبة سوء بتضر اكيد
عالج وافحص كل المرضى واخلص يصبح يومك عيد
*****. *****. *****. *****
يلا تعالى عيادتك جاهزه فيها
كل الكماليات
كده مش ناقصك حاجه خلاص جهزناها بالأدوات
مش ناقصك غير تلبس بالطو وتزود في المعلومات
وتشوف كل مريض يتبسِّم بعد الدوا والعلاجات
كده ربنا عجل بشفاهم على إيدك يا بو البركات
*****. *****. *****. *****
الطبيب :
كتر خيركم دا إنتم أهلي وانا ندمان عاللي فات
أنا مش عارف قيمة نفسي والطب دا باب الرحمات
بَحْمد ربي ضيع يأسي والبركه هتيجي َم الدعوات
أمارس شغلي جوا عيادتي وابعد نفسي عن الأزمات
*****. *****. *****. *****
بقلم د / عبد الرحمن فتحي الحناوي َ
من مصر .
ليست هناك تعليقات:
إرسال تعليق