بشعر العامية المصرية
( الأب كلمه كبيره.)
لو شفت مره أبوك قاعد عالأرض جنب الباب
شايل هموم الدنيا شارب من بحر العذاب
وملامحه مِتْغَيّرَه كأنه خالع ضِرس وناب
وملابسه متعطره كأنه رايح كتب كتاب
دور عاللي خلاه كده بين البينين
شويه فرحان و أكتر وفته حزين
الهموم هِيّا هيا
والمشاكل جوه الراس
والحلول جايا جايا
مستنيها كل الناس
****. ****. ****. ****
يا حبة الألم اللي لسه معلمه جوا القلوب
يا شكة الندم اللي ماسّه وخلت العاصي يتوب
الأب شايل هموم الدنيا
وربك قادر يشيلها ف ثاتبه
لكن الصبر الطويل
خلاه شديد ما يميل
عارف إن مولاه
بيختبره ف عيشته وضناه
وهو دا اللي خلاه
يزيد أجره ف علاه
الأب لسه بصحته
بمشيته بكل صفاه
ما تكبروش أزمته
دا قعدته في البيت حياه
سيبوه يخَرّج ضحكته
ويفرح وافرحوا معاه
ما تقتلوش فرحته
ما تجادلوش أبدا معاه
****. ****. ****. ****
الأب نفسه يجيبلكم م السما نجمه
كتر خيره.. من غيره ما تتهنوش بالنعمه
الأب كنز ثمين مليان عزم وحنين
الأب صوته حزين مش عارف يجيب منين
ظروفه كانت زمان أجمل وأحلى ظروف
وبيته كان عمران بالأهل وبالضيوف
وكان بيصرف عالكل
لا اشتكي يوم ولا كَل
جايب بسمه وسعاده
جايب الخير بزياده
يضلل عليكم وياخدكم ف حضنه
ويبعد أذاكم ويحسسكم بامنه
الأب هو الأب مهما جرى أو حصل
بيضحي عشان الكل وخيره ليكم وصل
عجوز ولا شب كلوا من إيدو العسل
****. ****. ****. ****
الأب ممكن يبكي لو شاف الأسى ف عينيك
وبكاه من غير دموع مش عايز تشوفها عينيك
الأب مش راح يشكي دا يحرم نفسه ويدٌيك
الأب حضن كبير بيساعيهم ويساعيك
الأب كلمه كبيره
الأب حسن بصيره
الأب سمعه وسيره
الأب أفضل جيره
الأب مهما نقول
هو بقى المسؤول
يارب بارك فيه
واحفظه دايما واحميه
من كل شيء يؤذيه
وعلى قد النيه اديه
****************************
بقلم د / عبد الرحمن فتحي الحناوي.
من مصر
ليست هناك تعليقات:
إرسال تعليق