وصلنا ،، لفين
ـــــــــــــــــــــــ
اشعار / ياسر عبد الحميد
ـــــــــــــــــــــــــــــــــــــــــ
وصلنا ،، لفين ،،يا بني ادمين
مشاعر لو تشوفها العين بتتأثر
وصلنا، لفين،، و ع الجانبين
شباب غايبين و دنيتهم بتتكسر
بدون تعريف ،، و مش تزييف ،،
عشان الكيف ،، بيشهر سيف
و بيشيلوا ، سلاح ع الكيف ،،
كأنه كفاح ،، لموت رواح
و رافعينه في وش ضعيف
و مش تاليف ،، دا واقع ،،
فيه بنتحسر,,!!
وصلنا ،، لفين،، و مين حوالينا بيفسر ،، !!
بقوا ترندات ،، لخلق الله ،، علي الصفحات
و كنا زمان نقول فيهم ،،
اللي اختشي مات
و ماضيهم ،، يناديهم ،، يعريهم
لا كنا نشوف بلاويهم ،،
ولا نسمع حكاويهم ،،
ما عاد في شئ بيحميهم
و يغنيهم غير ،، التفاهات ،،
وصلنا لفين,,!!
نشوف الحادثة ،، نتفرج ،،
بسلبياتنا و بنصور
مروئة ايه يا خلق يا هوو ،،
مافيش. مخلوق بيتهور
و حتي الناس مافيش احساس ،،
بتاخد اللقطة تتدور
تجيب الجاني و المظلوم ،،
في قلب البوست و تحور
وصلنا لفين،، !!
و حالنا لو بنحكي عليه,,يبكي العين ،،
و مش قادرين,, نغير طبع كان غلاب
و مش فاهمين ،،
سنين رواحه ,,,شايله عذاب
ضميرنا كتير بيستأذن ،،
ولا في الوقت بيأذن
و حالنا سكوت و مش احسن ،،
عشان نمضي ف حضورنا غياب ،،!!!
وصلنا ،، لفين ،،،!!!
ـــــــــــــــــــــــــــــــــــــــــــــــ
ليست هناك تعليقات:
إرسال تعليق