/ مهب لرياح
----------------/
{زجل... تجري اليوم بما لا تشتهي السفن}
بالمعنى
هذي كلمة هذا اكلام
هذي نغمة هذي انغام
يا الطالع درجة و ايطيح
كيف الريشة في مهب الريح
سرنا في دروب ليًام خطوات
البارح ألعبنا أطفال
امرحنا و ازهينا مرت ليُام
يا الغادي يحلم بالهمزات.!
بالهوى خويا فين اتبات.؟
من يحلم راسو طير يسبح
حر ايلاعب لرياح.!
هارب من الموت حاير محتار انهار على انهار اتجيه غفلة تديه.!
والباقي مول الحكمة يحكم
فين هارب خويا فين هارب؟
من ايشوف راسو ايصول
صنديد بين دجلة والفرات
بين النار او دخان البارود
هارب ايهرول يعتق لرواح
غبر هما خويا.......غير هما.!
من ايشوف راسو و ايشوف
في مراية ينسى ماضيه
من ايشوف راسو ايشوف في مراية ايعيش حاضرو
غزالة قدام اسبع ضاحك
اعطات رجليها للريح تهرب
الى انجات من انيابو
ترجع اتطيح في اشباك الصيادة! تدفن اولادها في شط لبحور
اتصير اغريبة فِ بلادات الناس
تتجرع لشواق و الحنين
صارت لقمة العيش أمل
غير هيٌ خويا....غير هيٌ.!
من يضرب بحجر الفريش
طاح سلاحو على صفية اتزلع
صار افريسة عند لذياب تنهش
كل الواحد فينا حاضي اجنابو
ناسي اقفاه أو قُدٌامو يلهث..!
خايف اليوم من اهبالو يحصل
لكبير فيهم يرقص امعنق الذل
يشطح يرقص بالعلالي مخمور
على وضعو ينبح راضي خايف
يصبح ريشة ترميها لرياح
ايزيد الغربة على الحكَرة ثاني
فين هارب تجري فين هارب.؟
من يحلم راسو طير امعلي
هارب من الموت ذيك القتالة اتلاقيه
اتكسرت اجناحو فالهوى
طاح طيحة بلا خاطرو
من ايشوف راسو غارق
غارق بين لبحور اتلاقيه
لا فلك لا مجداف يقيه.!
بادراعو ايحارب امواجها.!
بين دجلة و الفرات
نار أو دخان بارودها احموم
هارب يعتق لرواح
يوم ليكم يوم لينا
و التاريخ يحكي و ايدور
و العجمية تضرب العجمية
و السمرة تنفض اجنابها
هبت ريا ح
يا ريح هـَلاٌَ استريح
------
العابد عبد الرحيم:02/05/2019 منقح بتاريخ : 03/05/2025
ليست هناك تعليقات:
إرسال تعليق