و مِنه،، كتير
_____________
اشعار / ياسر عبد الحميد
_________________
الدنيا الماشية ب هواها
بتعلي الواطي علي قفاها
و الصدق اتمرمط جواها
دنيا غريبة مالهاش،، تفسير
علاقات بمصالح مشتركة
ادفع تترقي مع الحركة
و المخلص مستني الدرجة
كما لو شغال في اسطبل حمير
و الحال شغال،، علي دا المنوال
فيها البياع ،، و كتير حمال
بمبادئ قذرة تملا شوال
و بختم، احمر،، تحت التغيير
و السُلطة في ايد اللي اترقي
كان يوم غلبان، طالب زقة
خَد بنصيحة،،، عم حدوقة
لجل يركب جناحات و يطير
و بقا الامور سالف ذكره
بيعانو،، من خبثه ومن مكره
ويكِش كتير م اللي مذاكره
ييجي ع الغلبان يعمل عنتير
دي مصالح،،، قدامها مصالح
من، وقت المهد بتتصالح
انا عارف اني ماليش صالح
لكن اتعلمت انا منها،،، كتير،،،
____________________
ليست هناك تعليقات:
إرسال تعليق