( قلب الأم.)
كبدي عليه انا كبدي عليه
لما سألني احبابي عليه
قمت جاوبت بكل صراحه
قلت الدنيا ما فيهاش راحه.
حد يسيب ابنه كده شهور
بعيد عن عينه وبره الدور
بياكل إيه.. بيشرب إيه
وحالته وسيرته شكلها إيه
فهموني..طمنوني
عالبلد اللي عايش فيه
وارفعوا سقف الأماني
أصل انا دايما خايفه علبه
م الهوا كنت باخبيه
لما كان بيجيله برد
كنت بسهر تحت ايدبه
غير ساعات انا اتعذبت
لما كانت تسخن إيديه
قلب الأم دايما صاحي
مش محتاج اللي يصحيه
واخد باله م اللي اتغير
شكله وبيعاني من إيه
قلب الأم حاسس بيه
رغم بعده عن أراضيه
قلب الأم هو الأصل
هو الواحه اللي بترضيه
****. ****. ****. ****
شفت يا ابني لما كنت
وانتا صغير عامل إيه
عامل مركب بقطع ورق
وجوا الميه انتا بترمبه
فاكر لما كنت بترسم
عالحيطان صور كاراتبه
وتنط وتعمل حركات
زي اللي بيضرب بإيديه
فاكر لما كنت بتعمل
طياره وخيطها تِجَرٌِيه
فوق السطح رايح جاي
وصاحبك مبسوط بتسليه
فاكر لما كنت بتلعب
كوره والكابتن تلاقيه
فرحان بنشاطك ويقولك
خش عليه خش عليه
وانتا متحمس وبتجري
وغريمك شادد رجليه
فاكر لما كنت بتيجي
آخر الليل والضلمه دي إيه
وانا واقفالك عالباب دوغري
خايفه عليك يحصل لك إيه
فاكر ليلة العيد لما
تخبي الشوز اللي انتا شاربه
تحت سريرك وانتا سعيد
بلبس العيد اللي مخبيه
قلب الأم دا شكل تاني
بس يا تري مصنوع من إيه
ابني حبيبي الغالي وحده
شاغل قلبي وساكن فيه
***********************
بقلم د / عبد الرحمن فتحي الحناوي .
من مصر .
ليست هناك تعليقات:
إرسال تعليق